昨日个“长脚鹭鸶”

#打卡挑战局#

上海人叫人长得长个人是“长脚鹭鸶”。葛末，上海地面浪个最高个建筑，也好讲是迭个城市里个“长脚鹭鸶”了。

记忆当中，有名个城市“长脚鹭鸶”有得：国际饭店、杨树浦发电厂个烟囱、南京西路电视塔……

改革开放之后，新个“长脚鹭鸶”勿断出来，身高也远远叫超过了伊拉个前辈——东方明珠广播电视塔467.9米、金茂大厦420.5米，以及上海环球金融中心492米，而2016年竣工个上海中心，高度达到了632米。

但是，伊眼老个“长脚鹭鸶”还是勒海个。勒上海市民心里，永远有伊拉个位置。

国际饭店，南京西路170号，一直是上海个标志性建筑。原因并勿是伊个豪华富贵，更主要个是伊83.8米个高度，雄踞上海高楼之首，同时，伊还有“远东第一楼”个美称。迭个高度个老大个位置，伊坐了有五十多年。当时辰光，大家无论是勒人民广场还是勒人民公园拍照，背景总归要带眼国际饭店个。饭店顶端旗杆个中心位置，也是整个上海6340.5平方公里面积个“零”号位——城市坐标个原点。

国际饭店1932年8月动工，1934年12月1号开始营业。建楼资金三百多万，投资方是“四行储蓄会”。饭店个设计师是邬达克，承建商是当时有名个建筑公司——上海馥记营造厂，老板陶桂林以七十万块承包了迭个工程。

饭店个名字是一边造一边起个。先头是叫做“四行储蓄会大厦”，后来又根据西边个派克路，就是现在个黄河路，改名叫“派克饭店”，因为英文“park”个意思是“花园”，所以又叫“花园饭店”。一直到大楼竣工，再定名为“国际饭店”。1999年个辰光，饭店又重新进行了装修。

同样，也好讲是地标建筑个是杨树浦发电厂个大烟囱。

上海用电有得一百多年历史了。1882年4月，当时工部局个总董莱特勒挑头，英商集股10万两白银，成立上海电力公司。伊拉用5万白银勒勒乍浦路苏州河边浪建造发电厂，到1882年7月就开始商业性供电了。但是，只有几千瓦容量，只好满足附近几个地方个路灯照明。

1908年，工部局电力处用了7.5万两白银，买了黄浦江边头个沈家滩39亩土地，造了“江边电站”，也就是现在杨树浦发电厂个前身。1923年，发电厂以12台机组发电12.1万千瓦个总容量，成为远东第一发电大厂。六年之后，美国国外电力公司又用8100万两白银，从英商手里收购了工部局电力处搭仔伊个下属企业。

杨树浦发电厂个大烟囱是1937年动工个，因为抗战爆发而中途停工，到1939年再全部完工。烟囱邪气有特点：伊是钢板烟囱，勿像现在看到个侪是混凝土烟囱。烟囱外头侪是用钢板外包、用铆钉连接个，总个重量有得775吨。烟囱内圈是耐火砖，用防酸水门汀砌好。烟囱个底部直径有得7.9米，顶部直径是5.5米，整个高度是105米，经得起最大时速18607千米个风力。搿只烟囱勿仅高度是当时远东第一，勒技术设备方面，搭烟囱一道投入使用个，是当时远东最先进个高温高压锅炉。

后来个两根烟囱，一根是1978年，厂里自筹资金3767万元造个，高度180米，七九年竣工。还有一根是1992年，用德国政府个7500万元马克贷款造个，身高也是180米。

发电厂烟囱个上半部，按规定搨了红白相间个警示颜色。要是乘船从吴淞口进入黄浦江，到复兴岛一只转弯，杨树浦发电厂个大烟囱就勒眼门前，游客心里就会得激动起来——上海到了呀。

上海第一根电视天线，勒南京东路627号，永安大楼个十八层顶端。伊歇辰光，永安公司还是公私合营性质，资方郭家兄弟郭乐、郭泉就住勒大楼十二层。

发射电视信号，天线当然是越高越好。永安大楼个高度仅次于当时上海最高个国际饭店，但是，伊个其它条件要比国际饭店更加理想。勿仅是大楼顶浪架设天线，覆盖半径可以达到30公里；外加电视发射机安装勒大楼最高点，只要老短个馈线就好跟天线连接了。

1971年夏天，南京西路651号，原来上海体育学院运动系个一幅地块，成为了上海电视台个新地址。　

安装电视塔迭个庞然大物，当时也是创历史个。伊是先勒勒地面整体拼装好，再一次性吊拉拿伊竖起来个。10台10吨头个卷扬机，用了四个多钟头，拿横睏勒青海路浪个电视塔，慢慢叫个从水平拉成功了垂直。塔脚底座个螺孔，全部是邪气准足个套勒螺柱浪向，一只只螺帽捻紧。1972年9月25号，当时全国最高个电视塔，就搿能立好勒上海滩了。　

新个电视塔高210米，脚下头打了9根长桩，每一根17吨重，深入到地下头30米，竖起来足足有得10层楼介高。塔身自重500吨。为了让电视塔更加牢固，塔下头发射机房个基础，是跟塔基连成功一体个，迭个等于为电视塔增加了一只保险大底盘。

1998年4月30号，伴随上海人走过九千四百多个日日夜夜个电视塔功成身退。三年前头，名列世界第三、亚洲第一个东方明珠广播电视塔已经投入使用。东方明珠塔个底部有得只烟灰色管子样个铁家伙，伊蹲勒四四方方个水泥底座浪，管子底部捻勒9只螺帽。迭个，就是当年南京西路电视塔留下来个一只脚，装勒此地，实实在在个成为了东方明珠个镇塔之宝啊！